Sunday, June 26, 2011

تويتر ومتلازمة توريت

بداية لازم نتعرف على متلازمة توريت من غير رغي كتير ولا كلاكيع وكلام مجعلص هو عبارة عن خلل عصبي وراثي المفترض انه بيظهر من الطفولة في البداية بيكون في صورة حركات لاإرادية يعني غمز أو حركات بالإيدين او كحة في وسط الكلام غير مبررة و ألفاظ نابية بصورة مستمرة يعني كأن في رشاش شتايم كده طالع لوحده في الحقيقة المفترض ان متلازمة توريت من الأمراض الوراثية اللي يمكن تصنيفها انها نادرة جدا  وان كانت  لها  بعض الشواهد من التاريخ حتي في البلاط الفرنسي كان احد الدوقة مصاب بيه و كانوا  بيربطوا  ايديه في حضرة الملك لأن كان بيأتي بحركات غير لائقة في البلاط الملكي المهم ان الدراسات العلمية بتقول ان المرض ده نادر و لكن اعتقد ان العلماء لو أعادوا النظر مرة تانية في الموضوع ده حيلاقوا ان المرض ده منتشر جدا  و خصوصا في الفضاء الشبكي و على وجه الخصوص الشبكات الاجتماعية و بالأخص تويتر حقيقي هي  حاجة  صادمة جدا ان حد يكون عنده كم الكبت ده  وان يكون شايف ان الطريقة الوحيدة انه يعبر عن وجهة نظره ان يشتم و يغلط و يسب و يتجني على الاعراض مش عارفة حقيقة دي  عقدة فعلا ولا ممكن فعلا يكونوا عندهم مرض و يستحقوا مننا بس اننا  ندور لهم على حد يعالجهم ولا ده لفت نظر  ....و ان كنت انا بتبني وجهة نظر بخصوص الناس اللي بتعرف تعبر عن نفسها  بس بالشتيمة انه مش بيقدر  يتواصل غير مع الجزء الأقل تحضرا نتيجة عجز في قدراته العقلية او صعوبة الوصول  للجزء المتحضر نتيجة كسل او لأن الجزء ده مش موجود اساسا مقاييس التحضر يا اساتذتي الافاضل مش بكام كيلو شتيمة ولا انك عندك صفر ثوابت مقياس التحضر ان تشغل عقلك و تتواصل مع الانسان جواك 



أوعة تعمل skip


كتير الواحد بيقابل مواقف مؤلمة وبتعلم في روحه الألم من وجهة نظري شئ جيد الألم في حد ذاته بيحسسك إنك لسه عايش إنك إنسان .البني ادم مننا بيحاول يدفن الخبرات السيئة اللي بيمر بيها من باب انه مش عاوز يفتكر الألم ...بس لو فضلت تدفن خبراتك السيئة و آلامك عمرك ما حتتعلم افتكر الألم, افتكر الخبرة السيئة او تدوس في جهاز النفسي على  سكيب و المقصود انك تتعلم في ناس بيتبنوا  فلسفة تألم حتي تتعلم و انا يمكن شايفة ان الفلسفة دي اقرب لواقعنا لو دفنت  ألمك عمرك ما حتتحرك خطوة  لأودام خلي الالم صرخة تخليك تبني و تغير من حياتك ..خلي الألم هو الشعلة اللي بيها توصل لهدفك اللي بتسعي له طول حياتك


Friday, June 24, 2011

بدون عنوان


دايما كنت بحتار في اني  اختار عنوان لموضوع ما او لو بكتب  حاجة  مثلا على الكمبيوتر لو بختار اسم لملف حتي لو بختار اسم مستعار 
في الحقيقة انا مش عارفة اي سر اني مش بعرف اختار عنوان او ليه ذهني مش بيسعفني ...طيب هو ده ممكن يكون مثلا قصور  ذهني  عندي  حاجة  عقلية يعني ما ..ما هو وارد الامراض العقلية في زمانا ده  و ف بلدنا دي ما  بقتش بعيدة عن اي حد ..او يمكن يكون لها مدلول نفسي جايز لأني كنت دايما بيحصل لي خذلان من العنوان يعني يبكون العنوان شيء و يطلع المضمون حاجة تانية ..إلا بالمناسبة هو اي  عنوان البني ادم مننا ما  اقصدش عنوان سكنه  يعني و لكن اقصد اذا كان الموض وع لازم يكون له عنوان عشان اقدر  اعرف مضمونه او يدني  فكرة عن محتواه  هو اي  الحاجة اللي من خلالها  نعرف عنوان الانسان عشان نقدر تستشف  محتواه 
يعني خدوني على اد عقلي شوية 
لو تصورنا ان اسم الانسان هو عنوانه  يعني هو شرط عشان انا اسمي  كريمة مثلا ابقة كريمة او لو اسمي  شيماء ابقة حاطة مناخيري ف السما او لو اسمي انس يبقة بونس الناس؟؟!!!
طيب خلينا نتصور ان العنوان مثلا عنوان السكن طيب ده مدلول نوعي على المستوي المعيشي مثلا او الطبقة اللي بينتمي ليها  بس و الله عندنا  ف مصر انهارت تلك المسلمة في اماكن عشوائية كتير و افقر من الفقر ملاصقة لاماكن غاية في الرقي ...
طيب انا بقة عشان اعرف مضمون البني ادم اعمل اي ؟
قريت حاجة عجبتني اوي ان الواحد لازم يقيم الانسان من فعله مش من كلامه و لكن جه  فيلسوف تاني  دحض الفرضية دي  وراح قايل كلمتين عنب ليس بالفعل الواحد تسطيع ان تحكم على نبل الانسان يعني من الاخر  عشان تعرف مضمون بني  ادم تقعد ف دولاب  بيتهم و برضو حيفوتك حاجات
:)إيمان الشاذلي