Sunday, July 24, 2011

شوية غضب شوية دم





امبارح قررت اتفرج علي فيلم كنت نزلته من فترة و لضيق الوقت قررت تأجيله ثم تأجيله و لكن نظرا لزحمة الكمبيوتر عندي قررت اتفرج عشان امسحه الفيلم لما  نزلته كان التعليق اللي حفزني انزله ان الفليم بيتناول القضية الفلسطينية و انه انتاج مشترك بالإضافة لتهليل بعض النقاد العرب للإبداع اللي في الفيلم و اننا ازاي و ماوصلناش للعبقرية دي  في انتاج فيلم يحكي  مأساة القضية اللي  شبينا و كبرنا واحنا  عيوننا بتتابع فصولها يوم بعد اليوم
المهم ما اطولش عليكم هيأت نفسي بقة اني  حتفرج علي فيلم  يزيد لدي الحصيلة التاريخية حوالين القضيةو قعدت طبعا في البداية قلت اصبري اصبري حيعقلوا حيعقلوا اكيد اكيد البهاريز حتيجي  في الىآخر لكن اخر  اي  بس اذا كان اول القصيدة كفر
قولوا  عليا ان نظرتي  ضيقة للأمور و لكن لا أقبل ابدا ان يتم عمل تركيز على شخصيات نسائية داخل المجتمع  الفلسطيني  بالانحلال ده
شخصية الاب اللي بيغتصب  بنته و بتهرب و بعدين تروح تشتغل رقاصة في ملاهي اسرائيلية و بعدين تضرب واحدة و تاخد كام شهر  سجن و تقابل ممرضة جوا السجن تهمتها انها  هربت مجموعة من الجنود العرب اثناء حرب الايام الستة و بعدين الممرضة تعرفها على اخوها اللي هوا  احد ائمة المسجد الأقصي بالقدس و بعدين تتجوزو و تخلف  بنت مش بنته  اللي هيا  ميرال و ميرال امها تنتحر و بعدين ميرال تلتحق  بمدرسة حرجع لكم في موضوع المدرسة ده بعد شوية و تقوم الانتفاضة و تموت  واحدة من صاحبتها و تقابل  شاب  مسيحي من منظمة التحرير و تقع في حبه طبعا واخدين بالكم من العك الواضح
و الفرحة اللي  الشعب الفلسطيني  فرحها  لما اليهود اداهم جزء من ارضهم كهبة من خلال اتفاق  اوسلو
انا عارفة ان القصة الرئيسية عن هند حسيني  اللي بنت المدرسة اللي اتعلمت فيها ميرال و اللي كان دورها الاساسي ضم الاطفال اللي اتشردوا  نتيجة اجتياحات اليهود و ما انكرش ان كان فيه مشاهد تكاد تكون 1 % من العك بتحكي عن المأساة الفلسطينية
بس السؤال هو ليه العك ؟و ليه النقاد المحترمين ما اتكلموش عن الانحطاط و العك المبالغ  فيه في الحديث عن نماذج من النساء الفلسطينيات
اليهود لما غضبوا من الفيلم ما كنش غضب من فكرة السلام اللي بيحاولوا يزرعوها في دماغ المشاهد المسطول و لكن عشان في بنت يهودية في الفيلم بتحب ولد فلسطيني و ابوها رتبة في الجيش
بس كده انا فشيت غلي و ارتحت و ديليت للقرف ده خلي الكمبيوتر ينضف